إنك لا تهدي الأحبة

كتب يوم:: 20/09/2007

ميدو

الحب وسنينة

إنك لا تهدي الأحبة

هل ممكن الحب لوحده يغير من إنسان ويخليه حد تاني بطريقة تعامل مختلفة وشخصية مختلفة....؟!
سؤال كتير قوي كنت باسأله لنفسي لحد لما قدرت أو تصورت إني

قدرت أوصل لإجابة عنه، فمن خلال مواقف حصلت لناس قريبين مني أو قريت أو سمعت عن حكاياتهم كانت النتيجة اللي وصلت لها إن: بسم الله الرحمن الرحيم "إنك لا تهدي من أحببت والله يهدي من يشاء وهو أعلم بالمهتدين" (القصص:56).

ففيه ناس بتكون على درجة ما من الالتزام أو التدين وبتكون عايزة شريك أو شريكة حياتها يكونوا على نفس الدرجة أو أحيانا أكتر منهم في درجة الالتزام علشان يساعدوهم في التقرب من ربنا أكتر.

وطبعا ده كلام جميل فمن من حق أي حد إنه يدوّر على مواصفات معينة في شريك حياته وخصوصا لو كانت صفات مرتبطة بالتدين والالتزام والقرب من ربنا.

لكن اللي مش جميل هو الطريقة اللي البعض مننا بيتبعها للحصول أو الوصول لهذا الشريك. فكتير بيحصل ويلاقوا نفسهم بيربطوا مشاعرهم ومشاعر الطرف التاني بالتدين أو القرب من ربنا بمعنى إن لو بيحبني هيلتزم ولو بتحبني هتبقى متدينة أكتر، أو إنها التزمت علشان بتحبني أو بدأ يصلي علشان يرضيني.

وده أكيد بيسبب ليهم حالة من السعادة والثقة في حب الطرف التاني ليهم ولكن ده في رأيي بيضر أكتر ما بينفع وبيضر الملتزمين دول أكتر من الطرف التاني.

فلو دردشنا مع بعض في الاحتمالات اللي ممكن يؤدي ليها الربط بين المشاعر ودرجة الالتزام هنلاقي إن فيه احتمال إن الطرف اللي مش ملتزم يبدأ "يتظاهر" بإنه أصبح ملتزم وده علشان بس يرضي الطرف التاني وده اللي أكيد الطرف الملتزم ده مش عايزه، ده طبعا لو كان ملتزم بجد مش بيتظاهر هو كمان قدام الناس وبس.

لكن برضه فيه احتمال قائم وماحدش يقدر ينكره وهو إن الطرف اللي مش ملتزم ده يبدأ يلتزم فعلا، لكن هل الحب والحب بس هو اللي خلاه يلتزم ولا هو كان عنده استعداد من الأول...؟

في رأيي الشخصي لازم الطرفين وخصوصا الطرف الملتزم من الأول يكون عارف إن الحب ده كان "سبب" ومجرد "سبب" في الحكاية دي، يعني لو ماكانش فيه استعداد من الأول ماكانتش هتكون النتيجة مرضية لأي من الطرفين.

وده في رأيي برضه مفيد للطرفين سواء للطرف الملتزم لأنه من ناحية مش ممكن هيقدر يتأكد إذا كان الالتزام ده حقيقي ولا لأ، وإنه بالتالي هيحصل على المعاملة اللي هو متوقعها من شخص متدين أو ملتزم لأن ربنا بس هو اللي هيعرف.

ومن ناحية تانية وبالبلدي كده "مش هيعيش الدور" ويفتكر إنه خلاص أصبح مهيمن على كل مقاليد أمور الطرف التاني وإن بإشارة منه هيتم تنفيذ كل اللي عايزه.

أما الطرف التاني فهيكون متأكد إن التزامه وقربه من ربنا ده مش هيفيد أو يضر حد غيره وإن من مصلحته الأولى والأخيرة إنه يقرب ومايربطش ده بمشاعر ممكن بين يوم وليلة إنها تتغير، سواء مشاعره أو مشاعر الطرف التاني، فالله مقلب القلوب يهدي من يشاء وهو أعلم بالمهتدين.





	فيديو \| العاب \| ثيمات \| وسائط \| \| \|دليل مواقع \| شات \| رجيم \| اعلانات مبوعه\|التوبيكات \| النكت\|مقياس المحبه \| دردشة New Page 5

اتصل بنا - الاعلان لدينا - خريطة الموقع - برنامج جديدنا